In diaeto veneto 2001 | Poesie

ILUSION

Ilusion, vece sfése
verte sui parè scolorii
dela vita.
Screpole dolorose
sbocià ‘fa ortighe
fra le slorde incagnie
de n’ anima scancanà.
No ghè Cristi,
ne corone de orassion,
sora le teste pianzolenti
dei òmini che bàgola
ntei strosi del giasso,
dove el tenpo (anca lu)
ga alsà el bàvaro
sensa voltarse pì.
Squarajo de ore,
satà de nebia,
sgrinfe de situni …
ntele man alsà in sigo.
No ghè tenaje
a cavar el nero de sepa
inciodà al core.
Gnanca i pensieri co sén
beve le lagrime
dal posso dei sogni.
Ilusion; cartei de conpassion
picà sora a piene de silensi
sensa ponti da traversar.

MARIO MENEGHINI
Schio (VI)

SERA

Se gà fato sera
e la barca dei me sogni,
co la so vela d’oro
a l’arfio del vento,
la naviga lezièra
in un mare d’arzento
verso l’orizonte,
quel cussin de nùvole
che pare
bazàre el mare.

Grasie, bon Dio,
del dono dela vita,
anca se presto
tuto sarà finìo,
anca s’el mio
nol xè più un sogno,
sol un silensio
colorìo
dal sangue del tramonto
che, tra un fià,
sofegarà el giorno
e farà
sluzegar le stele.
Lazò in fondo,
al de là
de quea riga scura,
me spèta
l’Infinito.

MARCHIORO IGNAZIO
Schio (VI)

XE BEO

Xe beo vardarve, tusi,
e vedarve te i oci
s’ciantìse de emossion,
dolsi sogni che passa,
bronse che pipa
spetando ‘na esplosion.

Xe propio vero, stele,
che le speranse nasse
co se volemo ben,
che passa anca el dolore
co se ramena drento
passion e sentimento.

Se sa, la xe na roda
che va torno, pian pianeo.
L’ amore passa, serto,
ma i so incanti
ve jutarà a vedare sto mondo
on pochetin più beo.

SCARPAROLO INES
Vicenza

EL VECIO PONTE DE LEGNO

Un ponte fato in legno el perde i tochi,
el tien do fondamente co’ fadiga,
i travi e i tavolati mezi roti,
se lo sente scricolar e par ch’el diga:
Perìcolo pa’ i fèmori più ansiani
xe i me scalini, marsi e mal ridoti
da piova e vento e tanti, tanti ani,
dal sol de i zorni e ‘l giasso de le noti.
Xe i parapeti laschi e consumai
de le mòmole, da i salti de i putei,
ma mi ghe vogio ben, anca se guai
i m’à portà, co’ tagi de cortei.
Mi i conosso tuti, fin da fioi,
queli de questa e st’altra fondamenta,
e go sentìo passeti primarioi
lezieri e svelti..po’ via via, i aumenta
co’ el passar de i ani, péso e taco.
Po’ ancóra, i se fa sempre più lenti,
da un passo a l’altro longo xe ‘l destaco..
e da un bel zorno più no ti i senti.
Dal passo mi conosso tuti quanti:
Sòcoli de pute, tachi de tosete,
e l’orbo col baston ch’el pesta ‘vanti,
caresse de papusse de veciete,
sfiorar de gati e zampetar de cani,
scarponi duri e forti da soldà..
mi ghe n’ò viste tante in questi ani!
Ma tuti a st’altra riva go portà.
Ormai so vecio, legna so, da bruso,
sempre de più mi scrìcolo, so straco,
xe marsi i pali e più no i me tien suso.
Mi tegno bota, ma se po’ me spaco?
Feme da novo, feme belo, de piera,
e in marmo sia l’alsata de i scalini,
le colonete bianche, la ringhiera.
Che possa ancora védar i putini
nàssar e créssar fra ‘ste fondamente,
sentindo i so passeti pissenini.
Che senta el ciacolar de questa zente
che passa, sapegàndome i scalini..
e se la me pesta mi no sento mal!
Ma vogio ancor speciarme nel canal.

PURISIOL ALDO
Mestre (VE)

I TEMPI ANDA’…

Me piazeva che serate d’inverno
co ierimo, in chel tempo lontano,
serità, uno a l’altro vizzin,
a scaldarse intorno al camin,

co le ombre sul muro disegnà
da la luce d’on canfin impizzà,
a vardare on fuogo balarin
che brusava on toco de rubin.

Dopo on di passà a zogare
sui fossi giazzà, a strissare,
me piazeva, prima de ciapar sono,
scoltar le storie che contava me nono.

De la guera quindeze-disdoto
quando lu, ancora zovanoto,
el s’a catà dentro na trincea
coi morti chi iera na marea.

O quando el n’dava a lavorare,
el sòe sea ancora da alzare,
e chel tornava a casa straco morto
che iera ormai scuro patoco.

Ogni tanto, come par far festa,
soto le bronze sconta e ben coerta,
messa li apposta da me mama
na qualche patata mericana.

Se n’dava a nana piuttosto prestin,
el léto el iera on giazzarin,
e me ricordo che a noaltri fioi
i ne scaldava on fià i ninzoi

co la “munega”, on marchingegno
fato co quatro tochi de legno,
dove i ghe meteva on “scaldin”
pien de bronze tolte dal camin.

I iera tempi calmi e tranquili,
pochi gaveva par la testa grili,
pur essendoghe pi povertà
la zente iera manco incavolà.

Pò, ze rivà la television.
Zé sta pézo de na rivoluzion!
In casa pi nessun ga parlà:
tuti lì a vardare, inmagà!

El mondo in casa ne ze entrà,
tante bée robe ghemo imparà,
ma semo incorto che dapartuto
che zé del beo, ghe zé del bruto.

I noni zé sta messi da parte
come on vecio paro de scarpe,
le so storie no ga pì interessà
neodi schiavi de la publicità.

No ierimo tanto informà,
non savevimo le novità,
ma le iera tanto bée che serate
intorno al camin a magnar patate.

BACCO NERZIO
Boara Polesine (RO)

SERCANDO PASE

Sta queta primavera
e portame solo la to aria
fresca e più leziera.

Sta queta primavera
no ti vorà miga,
come ‘na volta,
portarme batiti de cuor
e far scorar el sangue
pien de calor?

Sta queta primavera
che adesso me basta
el to profumo
par farme tornar
visi, verdi cantoni
e sogni che oramai i xe stanchi
e i dovaria star boni
farme solo ricordar
quelo che gò perso
e quelo che xe andà via
prima de mi lontan.

Sta bona primavera,
portame solo ‘na carezza
de fiori profumada
par imbonir ‘ste ore
prima che vegna sera.

RUPIL GIUSEPPE
Mestre (VE)

NEL SBACIAR DE LA MATINA…

S’inpazava mato el vento coi nizoi
tirà su coi ori sbrindelà de goze,
quando zercavo de ciapar par on canton
anca le nuvole che in chel fosso se speciava…

Oncò sguarato i sogni al canto de le rane
inroja nel saco sbotonà de ‘na foreta,
in ‘sto nastro verderame in mezo ai campi,
ch’el dumia del solare dei moschini,
e ch’el bagna i so lavari de fiori
soto le onbrele de l’erba cavalina.

I narà via sti sogni resentà da la lissiva.
che ga sgozà dal colaoro grando,
in chela nuvola stufa de vardarse,
par spanpanarse ramenghi par el cielo
sora ‘na testa de cavej oncora biondi.

Strinà da ‘na luce molà zo par gnente,
neti i nizoi e inprofumà de spigo,
je metarò inpiegà nel casseto de l’armaro
coi santini che mai i smete de pregare
e li cubiarò coi sogni che ghe resta

tra i denti de on petene de osso,
da tirar fora nel sbaciar de la matina
vizin ala bozetina con l’acoa de le rose
par sgatejare che l’oro che smarisse
de do dreze bionde on po’ desfà.

GATTI LUCIANA
Minerbe (VR)

STRADA GRANDA

Strada del mi paese
Antica strada
Che te te speci ‘ntel canale
Fiorì d’alghe e de foie
De la grandessa passà
Solo el ricordo te
Resta ancora.
Strada granda
Casa sicura
Testimone de desideri e pene
Frantoio de staion e de sogni
Fra i alti palassi
Rivestì d’ anonimi colori
‘Nte le sire d’istà
Te porta el vento
Co’ antiche romanse
Profumo de tigli,
Brusio de ciacole
Teneresse d’ amori.
Sul palcoscenico de porfido
Va in scena la vita.
Do ruoli per tuti
Atori e spetatori
Se varda, s’è vardà
Se se volta al frusio de ‘na gona
Se ferma el passo
Al slusegar de le vetrine
Se nota presense e assense
Se sorveia dal ponte la carpa
Che timida aboca
Se tende parole e sorisi
A slargar orizonti al cuore.
Intanto passa lenta e rosa
La dolcessa de la sera.
Mi scollo la vose del tenpo
E “vardo sorpresa tuto quel che vive”.

STOPPA BRAGA BRUNA
Adria (RO)

VARDO ‘STA ME CITA’…
( a Treviso )

Vardo ‘sta me çità
che se alsa linda
come ‘na giòssa de cristalo,
‘sta çità che se incipria
co’ el rosa de le albe
e la se acòcola piàn
dentro matìne ciàre.

Verso i mexodì la se perde
ne’ la musica che sòna
i vèci ambulanti
drìo el Calmagiòr (ariete da organeti,
vioìni, fisarmoniche).
Cità un po’ spròta un po’ indifarente
ma sempre lexiéra, intrigante.

La speòcio de sera, inbriagàda
dentro el rosso de’i tramonti
quando la se inpissa ne’ le piére,
da le altane a’ i sotopòrteghi
da le cèse a le piassète.

Po’ la vedo, bonòra destiràrse
come ‘na sirena blu
-co’ i silensi che la veja-
dentro el scuro morbido
de’ la nòte.

DAL ZILIO RINA
QUINTO DI TREVISO (TV)

LA CASA DE ‘NA VOLTA

Gèra ani
che no tornavo,
a la casa de ‘na volta,
sgorbià de erbe selvadeghe
cressue drénto i muri crepà:
el giasso, la piova,
el vento del monte
ga ruspà el tròso
come el muso de un vècio
e drénto i ragni
ga fato sagra
in te ‘na nebia de scarpìe.
Tacà la cornise del specio,
scartossà dal salso, xe restà
un ritrato sbiavà,
fato có la machineta col lampo,
un ritrato che ga vèrto
‘na busa de ricordi, par calarghe,
co’ la rùzene del tenpo,
el secio de i me sogni.
I me domanda in tanti
se volesse fitarla,
la casa vècia,
ma no’ ghe lo posso dire…
e anca a dirghelo
no’ i capirìa
che no vojo fitarla…
…par ‘na fotografia.

MILANA LUIGI
Pontelongo (PD)

PIÈGORE ZÀLE

Trema la man del pitore
che disegna piègore zàle
sul quadro nero de téla cinese
po’ cofà ònbre col ciàro t’i òci
le fa pascólare sul verde d’i canpi
grandi cofà Ia speranza del cuore.
Quando e stéle de carta e se stùa
da’e scóine del vento
la fantasia de ‘na fòla
se fa imagine d’on credo,
l’ànima se remocia t’i pensieri.
La fontana del cuore
respira tuto l’acuto azùro d’i violini,
i verbi d’i sogni vagabondi
e t’i òci spalancà
‘tòrna meravèje de storie cusie de ricordi.
El pitore move el penéo
co’ ‘na giraòlta de mago
fin a vèrzare tuti i orizònti
drènto l’inocenza d’i putìni.
‘Na rondina distrata
sbàte ‘dòsso ‘na piègora
sporcàndo de zàlo i confini del çiéo
e dal paradiso d’i miragi
fin al pòzo d’i rimorsi
se alza in canto la vòse de ‘na preghiera.
Su’i siénzi de’e promesse, tase el cuore
intanto l’ònbra de’a sera se rónpe
contro el muro de’e emozión.

BONVENTO LUCIANO
Buso (RO)

ANO DOMILA

Camina camina
semo rivà
al‘ ano domila.
Quante esperiense bée e brute
ma tute degne da éssare visute!
Parché ‘a vita xe bea
anca se ‘a xe cunzà
da qualche procea!
Solo ‘odio ‘a fame ‘a guera
vurìa canceare
da ‘a facia de ‘a tera!
El sòe xe ‘nda zo
so naltro secolo
e anca so naltro milenio
e n’alba nova
se ga alsà a ‘orisonte.
Signore
fa che tuti i òmani
i te versa e porte
del so còre
parché solo cussì
ghe sarà pace e amore.
Voltemo pure pagina…
so sto secolo insanguanà
e scuminziémone una nova
daxéndose ‘na man
par canbiare ‘a socetà
zercando prima de canbiare noantri
e pò che’altri!
El mienovezento el xe sta pien
de nove scoperte e invenziòn
ma no1 xe gnancora sta bon
de sfamare chi xe pien de fame!
Semo rivà in te ‘a luna
in te marte e anca pì in là
ma ghemo inquinà el nostro pianeta
che el xe el pì beo
che Dio ga creà!
Xe propio ora de pretendere manco…
par pensare on fià de pì a che’altro…
che in fin dei cunti el xe nostro fradeo
co’ i stissi diriti de vìvare seren
soto sto unico “nostro” céo !
Cossa disìo voaltri?
Mi dasìo rasòn in tanti?

MARIVO GINA
Rovigo

PERLE DE FOGO

Da sora de la piera,
del vecio fogolaro infumentà,
s-cioca le sbrase
che le rinbalsa in alto,
dal soco che xe in parte sa brusà.
Perle de fogo.
Coando le perde el so slusore,
le casca so, de soto
e le deventa senare,
no le ga più vigore.
Coalcuna più gajarda
la core, su, dentro la capa,
portà da l’aria calda,
legera, al pari del pensiero.
Tacà, so na caena nera,
brontola l’acoa,
pronta, par fare la poenta,
da dentro del caliero.
E sogno, el caro fogolaro
in casa dei me noni,
perle de fogo, calde e pressiose
che mi, poro toseto,
vardavo inbanbolà.
I tenpi xe cambià,
el fogolaro, ancò,
tuti lo ciama “camineto”,
la piera tegnù senpre ben netà.
El fogolaro,
el perde el so carisma
al pari de on’altare sconsacrà.
A gerimo poaretri, coesto xe vero,
ma torno al fogolaro,
perle de fogo
ghe dava ala fameja, l’atmosfera
e le ghe dava caldo
e le ghe dava luce
e le ghe dava pace
e se tirava sera.

DE ZOTTI ADRIANO
Castegnero (VI)

MEMORIA

E te go persa, cara,
a poco a poco,
có xe finìa la tela de i to giorni.

On muro xe franà
soto i me oci
insieme col castelo de i to sogni.

Tra le begonie cresse
‘ncora el me ricordo
de tuto ‘l tenpo brustolà so ‘l fogo
de i me pensieri insulsi
incatejà de versi persi
par via del vento muto,
solitario
che ‘desso me s-ciafeza
par dispeto.

S’à scancelà el to nome
in riva al mare,
ma mi son la to sabia,
el to bacheto
par scrìvare na data
che no more.

KLEIN MARIO
Padova

GIOVINESSA

Giovinessa zbiava, scarognà,
la nostra, alenà
a tajar speranse
co la fòrbeze de la mizeria.
A le porte de la guera,
mi e ti spozeti crui
a calcar pèche de emigranti
inte i canpi de la Germania…
Te ricordito, vecio mio,
ghemo supià via i nostri dì
sora bietole e tabàco,
ghemo zvodà a séci
on suóre silensiozo
mastegando l’unbria de la note
cofà on pomo garbo.
Gavevino fato on contrato
co verbi inciauscài,
biasteme nate a s-ciapi,
parole séche, de comando
che l’umiliassion segnava a croze.

Drento, tuto ze restà intato
cofà na bestia inbalsamà,
(e mi e ti savemo quala)
par volontà del tenpo
ogni criada o altro
ze sta vendùo al ricordo
deventà par senpre nostro
drio cancei che l’anema
no sara mai.

PEROZZO ROsANNA
Caselle di Selvazzano (PD)

SCOLTAR

Co i gavevo darente
gnanca morte morir
mi
che i scoltavo,
perche i grandi de i tosi
no i capisse mai gnente.
Mi, po’!
Mi savevo za tuto.

Desso
che sò grando anca mi e che me inacorzo
de quanto sò putelo,
desso xé tardi.

Desso
che sò grando anca mi e che me inacorzo
che no so ancora gnente
desso no go nissun
più
che me parla,
desso no go nissun
più
da scoltarlo.
Ma i grandi
che ti ghe credi o no i capisse e come!
E lori
da là dove che i xe i me sta scoltando
più de quelo che i scoltavo
mi
co i me gera darente.

E da dove che i xé i me sta parlando
co le parole semenàe par ani e ani
che sento forse pa la prima volta
adesso che sò grando,
grani
de amor che no capivo
che taca finalmente a far raìse
desso
che no i go più.

FORNO GAETANO
Padova

MIMOZA IN DONI

Rama afessionada de rado stacada
de zorno in zorno me sento ferida
par essàr femena o pur margarida
so’l prà gelozo ea façia provada

De me ama no m’ama conta eo spolio
po’ te dizi el to nuo no da geozìa
cussì de l’acaçio fior l’orgolio
gha la cagjòn pì zala che ghe sia

A primavera xe on fior par passiòn
sia in parter o pur in periferìa
inzalendo lu’ sverna la stagjòn

Oh ‘omo no sta infinzarte sorniòn
el fruo de la çepa xe soltanto mia
coando l’amor par tì xe so’l ocaziòn

MIALICH GIUSEPPE
MIRA PORTE (VE)

SPEGÀSSI

No’ me ne importa se ‘e rime stona,
se i versi se intràgia o i score via;
spegàsso un fià de roba in fantasia
se so’ de estro o se go ‘a luna bona.

però, se penso a i oci de ‘a me dona,
o se me imàga el svo’o de ‘na sisìa
me se resvègia drento ‘na poesia
e sento ‘l cuor che strense e se emossiona.

Rancuro alora queo che più me piase
e imàgasino tuto nel sarvèo,
e po’, de note, quando el mondo tase,

co’ xe el siensio più profondo e beo
scarabòcio i me versi in santa pase
e vago in leto co’ s-ciarisse el çieo.

DITTADI ILARIO
Campalto (VE)

SE PODESSE ZOVANE VURIA TORNARE

Novantaoto Primavere ho
so le spale
le ho spese scuasi tute
trà mont e vale.

Se podese zovane
zovane vuria tornare;
rifar la stesa strada
non importa el tribulare

a coltivar de la Montagna
la dura tera,
ma non vedare pi el Mondo
a far la guera.

Tornare sol monte pi alto,
opure coelo pi modesto,
vedare on panorama pi ciaro,
pi giusto pi onesto

on Celo pi limpido,di tanta Pace,
di tanta Armonia
par dire al Mondo tuto
coanto bela è la Poesia.

FRIZZO ANGELO (ZALICA)
Recoaro Terme (VI)

EL ME GATO

Te vien coàto coàto
a farme conpagnia,
e te me salti a on trato
desora dea scrivania.

Te te movi a coa drita
fra libri e incartamenti,
e so la carta scrita
in siensio te te adormenti.

Po’ coando xe ora de l’ateso desinare
mi magno e ti te me stè a vardare,
forse co on po’ de malinconia
te speri che no magna tuto e che la buta via.

CECCOLIN ANNA
Anguillara Veneta (PD)