in diaeto veneto 2002 | Poesie

POESIE PREMIATE SCUOLA

MARCO

Marco el xé on bel putin,
on fià picinin,
i oci, i xé vispi e grosi.
El xé scuro de pele e
co na bea panzeta.
El xé ogni dì pi vispo e
atenti col se rabia!
Co el xé rabià
el tira fora i sciafoni,
el mola patone!
E de zugare
nol xé mai stufo:
sona la campanela
finise la ricreazion
se frema la partia
e lu…
el fa sempre
on gran sbufon.

DANIELE SAVOGIN
Scuola Elementare Boara Pisani (PD)
Classe V
CONTENTARSE DE POCO

Me non el me dise sempre:
«Vojaltri bocia de desso, a ghi tuto:
magnare, bevare, zoghi…
e no si mai contenti.
Mi inveze pa’ ‘ndare a scuoea,
miga come valtri
ghevo na pastina!
Mi gheo ‘na patata in scarsea;
a jero contento istesso.
A zugavo a cucuce,
e ridevo anca sa ‘ndavo in leto
col stomego ca me ruzava».

ELENA TOSARELLI
Scuola Elementare Statale Villanova del Ghebbo (RO)
Classe V
EL LAGO DE GARDA

Le vee e coreva
in tel lago argentà
spinte dal vento
lesiero e agità.
De mie couori
te deventi ogni dì
co e vee che te solca
pian pianin.

MARCO SIVIERO
Scuola Elementare Boara Pisani (PD)
Classe IV
POESIA IN DIALETTO

Cara primavera
a xè tanto ca te spetemo
par mettere da parte
stue camini termo
e mandar via l’inverno
el sole riscalda la tera
e i campi el varsuro li fa mori
mentre i frutti xè pieni de fiuri.

I alberi da frutto
i xè za in fiore,
spampanando el so bon odore.
La rana verde
la se mete a racolare
annunciando
che fra poco xè Pasqua
e xè tempo de somenare.

CLASSE TERZA A
Scuola Elemetare Anguillara Veneta (PD)

EA PASQUA

El giorno de Pasqua
l’è proprio on bel giorno
metemose insieme
par far on girotondo
e parchè ghe sia
sempre eà pace nel mondo.

CLASSE TERZA A
Scuola Elemetare Anguillara Veneta (PD)
EL GIORNO FEICE

On quo so feice
so feice aè
a coro in bicicreta
de drio ae roe
de i me compagni
co l’erba che me grata le gambe
e co la sabia che me
impinise le scarpe
co l’aria ca me frize sulle rece
a so proprio
feice…

ALBERTO BOSCARATO
Scuola Elementare Boara Pisani (PD)
Classe V
‘NA PUTEA DE VIANOVA

A Vianova ghe iera ‘na putea
Che la se credea massa bea

La domenega la ‘ndava a spasso
Col moroso un fià più basso.

La savea impastar la brazadea
E col mescolo tirar la tajadea

La ghea du oci da briganta
E ea se stimava tuta quanta.

Ma un dì la se gà specià
E a se gà incorto che un dente jera cascà

Tanto la gà zigà, tanto la gà urlà
Fin che mata la ze deventà.

ANNA ALLODOLI
Scuola Elementare Villanova del Ghebbo (RO)
Classe V
I MONDIAI

Francia, Olanda
Giappon,
ea forza de on
ciclon.

Italia, Spagna,
Inghiltera,
ka tuti i
gol i
segna a
rasotera.

I mondiai
fra Korea e
Giappon ma
ea copa del
mondo se
vinze insacando el baon.

GIANMARCO SARTO
Scuola Elementare Boara Pisani
Classe IV
EL VIGILE

Ze da tanto che conoso el vigile de Boara
Ze da quando che iero picinina, me nono me portava
A scola con la macchina e me pareva de zolare
Da casa de me papà fin in piassa.
Xè venerdì del marcà e lu l’è là, sempre attento
Ai putei che non se fassa del mal, perché i corre
De qua e de là, come tante rondinee.
El nono el me dise che l’è bravo,
che el vien da na fameia par ben.
Tacà a la so divisa el ga na medaia
E anche sol so beo capeo bianco in testa,
slonga la so testa in alto, felice e contento,
la vita vissù con la so onestà.
Vose d’i amighi lo saluda a brassi alti,
toseti mame e maestre i ghe dise ciao e grassie.
A scola scoltavo la maestra che el vigile
El gheva salvà na mama drento el canale,
iera drento l’acqua, sta machina, con la dona,
fortuna e coraio, cofà na volpe, el se ga butà.
Go dito drento de mi: el xè l’eroe del paese.
L’è l’amigo tantop passiente con tutti
Anche con i brontoloni, el merita premià !
Doman voria che el me paese el fusse come el
Nostro vigile, cussita zovane, saggio e normae
E non con cavaroni, pincioni o zente che fa cagnara
Che infanga i balocchi.

ALESSANDRA BONFA’
Scuola Media Boara Pisani
Classe III

ADULTI

AUSCHWITZ

Scólto el laménto
inzenocià e chièto,
restà picàdo via nel vénto
come polvàr de morte
drénto le bóche smorsà de i fórni.
No’ le pol più ‘ndàr drìo
al volàr lezéro dei cocài
le creatùre cavà zó
del dirìto de èssarghe,
mame, nòni, butini.
Onor sbregàdo via,
spampinà come çendàr
drénto el canàl de l’»Olocausto»,
scancelà, parché scancelà
1’è el cór de l’òmo nero!
Morto, parché l’ amór l’è morto.

Ma no’ móre el tempo.

Vèrzo la finestra al giorno nóvo,
vola alti ancóra s-ciàpi de àle,
j-è verdi i rami dei boschi,
e se intrósa piàn, a piàn
el laménto etèrno,
inzenocià, del vento.

DIANA MAIMERI LUGO
Isola della Scala (VR)
AI FIOLI

Corèvi, supiuni de vita calda,
i vostri dì carghi de sorisi
co mile mundi streti ai denti
prunti a deventar el vostro universo.

Par valtri ghen strucà el core
e, ntel pòcio trato fora,
ghemo insupà la nostra vita.

Nte un piato d’oro ve la ghemo dà
credendo cha amor ciamasse amor…
Tuto ghì bevù… ani de ben,
dandone indrio un goto de vento.

Desso sen vedi, despersi,
soto el celo pì sterpo
ndo gnente ne fa pì raìse.

Sen vegnù lustri de tuto
a bàtare a la vostra porta,
a sercar pa la nostra neve
un ramo dei vostri brassi.

Dentro el mar dei vostri òci
ghen visto el cor scapàre,
noàre muto al largo….

Nte na bòta, la nostra vita,
ze slavinà da ogni speransa
e sensa catar na man
in che l’aqua turbia la s’à negà.

MENEGHINI MARIO
Schio (VI)
GOSSE DE LAGO

El fià de la sera
Dindolando lumini
E nostalgie,
el passa sora el dolor
come gnente fusse.

Bruschè de stele
Le scolta i me magoni
Ne l’udor de i fiori,
e del lago
le varda l’erba rebutà
sensa pì l’ombria
de ‘na pesta
che gò ancora nel cor !

Anca el vecio ulio
El moe ‘n de l’aria
Le rame noe…
Tuto l’è come prima,
gnente l’è come alora…

Tante lune, passarà
Dormendo o piansendo
Ma, el sol diman
El sugarà le gosse
Sora i sospiri
De le onde
A riva.

AGNESE GIRLANDA
Verona
EN LIBRO PAR MI

En libro par mi
el desliga fantasie
tra le pagine ciàre
vestìe de parole.

Me sprofondo
nei sò profumi
drento ‘n tempo
che se fa nuvola;
el deventa cussì
‘n tòco de vita
par la me vita,
en fogo che còa
soto la sendàr
spetàndo `n supiòn
par impissarse ancora.

Tòco storie e presense
con mane sempre famè
de sensasioni nòe,
e sfoiando pian pian,
quasi con timidessa,
petali che no spanìse mai,
se scalda ancora el cor
e l’ anema,
come n’aquila granda,
…la slarga le so ale.

ROSETTA CASTELLI
Sorgà (VR)
DE TI OPÀ

Par ti opà sta neve de persegari in fiore
ste nuvóe coegà tel bombàso de Aprie
sta primavera, sta luna t’i spagnari
ste brónze de batisòsole e de stèle.
Da’a carezà dove l’odore del’erba
supìa sul’orgolio del to’ sudore
te védo ancora col xe ora de çéna
tornare cola sera t’i òci
fiscciàndo cofà on merlo che sfida el vento.
Par ti opà l’inverno noi jera mai frèdo
gnanca davanti alla miseria te piegavi el zenòcio
e mai jera cativo el to’ òcio.
Fiero e a testa alta
anca quando te morsègava la fame
cola falzina sempre spozà te’a spala
cofà te vóissi tajàre tute e robàze
tute e giraòlte de’e paróe scrite
da’i òmani inbrojóni tel vocabolario d’i poariti
El sole cala ogni sera tel bancòn del’adese
e anca i piòpi i pare fiori de carta
solo ‘na fotografia ne’ restà de ti
fata davanti al muro screpolà de’a casa vècia
col to’ vestito bòn de’a Domenega
coli òci impirà driti drènto i nostri òci
cofà a ricordarne sempre la strada del voérse bèn.

LUCIANO BONVENTO
Buso (RO)
VIOLENSA

Tredes’ani nel corpo e ne I’anèma :
‘na butìna!
Mia bastànsa paurosa
par quela man bruta e curiosa,

«Lasaròn, sporcaciòn» avaria volù dirghe,
ma no ero mia bona,
la paura la fasèa da paròna.

I pensieri, che a cambiarli in parole
sembrava un calvario,
‘na matìna i ò scriti drento a’n diario

con la speransa più sconta
che qualcuno lesésse
e iutàrme podésse
a spiegàrme quel’onta.

La l’à leto me mama e coi oci in cantina
l’à brusàdo quel foio, drento al fogo in cusìna

e nesùna parola, gnanca un comènto
par tentàr de aleviàr el me grande tormento.

Quanti ani è passa’
da quel giorno de agosto?

Trentauno…
e quel mal drento al cor
che no rièsso a spartìr con nesùno,
pian-pianìn el sa chietà

e ò capì che la gente l’è come un giardin:
ghè le rose,i papàvari e le viole,
se el se ràmpega l’è un gelsomìn,

ma par tera, ne l’erba gaiàrda
se infila de sfroso …la gramègna bastarda.

CLAUDIA MODENA BURATTIN
Mizzole (VR)
ON CRISTO DE STI ANI

Go visto
on poro Cristo, ancò
passare par la strada:
facia da desperà
corpo patìo.
El ‘ndava vanti curvo
e a testa bassa
come se on gran peso
el se tirasse drìo.
A védarlo, chél toso
no’l gavéa trent’ani
ma za scominsiava, par elo
la stimana de Passion.
Onto patòco
e coverto de strasse
come on fabiòco
el ghe parlava al vento
ma dato che nissun
se savariava
la so Via Crucis, da solo
el continoava.

INES SCARPAROLO
Vicenza
L’ULTIMA CAREZZA

El gomissiel dei ricordi
te desfavi pianin che la sera
quando, inzenocià vezin ai to piè,
la me testa sgarufà de butina
fondava ne la tò cotola nera;

Vedèa le to mane piene d’amor
strucàr insieme le parole
scrite sora na letera de carta fina,
«par via aerea» te disei, la vegnea
e intanto te la carezavi na sçiantina;

Fissandome seria,con la mente distante,
te me contavi, incorà del fiol emigrante
che lassando, nà sera, la so tera e i so cari
l’avea corso drìo a altri sogni e fortune
par contrade foreste, in paesi oltre i mari;

Nei tò oci, speio de l’anima,
se podèa lezar sçeto el to dolor
e le parole slise ormai dal tempo
le ghe metèa le ale al tò cor
fasendote volar par cieli senza stele
vezin al tò usel migrador;
Sentèa carezar la me faci de butina
da la tò man calda e molesina
te cascava,ogni tanto,na lagrima sui zenoci
e mi, senza el coraio de guardarte,
te consolava sugandote i oci;

No tè volèi gnanca imaginar
che la tera straniera, maregna la tò caro,
te spetavi….te spetavi…. e ogni sera
sempre e ancora de lu te contavi
guardando la mè testa ponsàr inzima a la tò cotola nera;

E quando…. che la freda matina,
un longo sospiro de pace
la desligà l’anima da la triste agonia,
con le mane bianche incrosè nel rosario
la tò ultima careza…. lè stà a la so fotografia.

NADIA ZANINI
Bovolone (VR)
ROSA D’ INVERNO

Le fioriva in zardìn
e le gèra rose de Magio.
Ma ‘dèsso più no se afàna
soto un peso crudel…me mama.
Cappa d’angòssa che ‘spèta l’evento.
E destin xe stà par le rose!
Tristo ‘l zardìn senza caresse,
‘l more.
E ‘ntanto la campana botìza
un vespro cargo d’incenso.
‘Dèsso si le piaghe xe vèrte
e la gramegna prospera nel pensier
migrador,
tra spière de luse.
Spassa ‘l vento i picoli rosèri
sbandonài,
e ‘l tormenta ‘l me pensier.
Po me so svegià.
Ma ti no ti te beàvi…nel sono.
Sora che rose ti te cuci…mama,
‘dèsso.
Te sèstu inacorta che soto ‘l balcon
del to calvario,
rossa, solitaria, splendida,
xe sbociàda ‘na rosa… d’inverno!

GUIDO ZANGRADO
S. Marco (VE)
LA PRESSA

Le case xe sempre più alte,
le strade sempre più piene.
Zente che core e ti sempre più soea!
Nessun ga tenpo par na parola.
Tuti ga pressa, no se pol fermarse:
na vita piena de frenesia.
Se core par arivare
se ga da far cariera
se no non te si gnente.
I omani se massa come i poeastri,
i matrimoni se desfa come calseti,
putei butai vivi so i cassoneti,
‘1 core no ga più palpiti d’amor.
Se voe `ndare contro natura
i erbivori farli carnivori
e le vache deventa mate.
No se capisse più che no serro eterni,
che basta soeo aver saeute
e che questa no la se conpra co le valute.
Serchemo de star mejo e vardemo la natura:
le vioete le profuma ancora,
la rondinea voea za
par dire che la primavera xe qua.
Inparemo a voerse on poco de ben
femoeo on soriseto che gnente `1 costa.
Daghe na man a to fradeo.
Te te acorsarè che ‘1 vivare
Sarà più dolse e più beo.

CAMILLA BARACCO
Campodarsego (PD)
CORIANDOLI DE OTOBRE

Son qua anca st’ano
A muciar foie,
coriandoli de otobre
che strache man del vento
buta zò a sbrancà.
le sarà coerta
par piante e fiori
prima che ‘riva la bruma
a sbiancare tuti i colori.
Speranze arbino insieme
e na sperà de sole
par scaldarme i ossi e ‘l core
quando no ghe sarà più foie
e gnanca ilusion.

ENZO SAGGIORO
Legnago (VR)
VURRIA

Vurria che l’eco
de ste guere,
sepur lontane,
el cessasse
e, se sentisse dir
come nele bele fole:
che arabi e ebrei
i s’abbrassasse;
che serti lupi
i xe deventà agnei
e , più bela su tute
che d’ogni arma
se farà un segheto
par tajare el formento
e sfamare i putei.

MARIN PASQAULINA
Pressana (VR)
VURÌA

Vurìa essare
un contadin
e ’ndar pa’ i canpi
de tuto el mondo
a semenare
un fià de bontà,
parchè massa poca
ghi ne xè restà.
Ghin butarìa
In tuti i cantoni
Stasendo tenta
De no sbaliare,
de no desmentegare
proprio chei posti
dove che più
bisogno i ga.
Semense che fassa
Canbiare sarvèlo
A chi comanda
Soto sto celo,
che no nassa guere,
che no mora gente
parchè, tanto, tuto
no serve a gnente.

MARIA ELSA SCARPAROLO BARTOLOMEI
Vicenza
ISRAÈL

Sassi su le coline squerte d’Israele,
sassi, fiori de piera:
trasformè en case, citè, giardini coltié.
L’Ocio de David l’è ‘na stela
che pianse soferense lontane.
Sòpia el vento caldo su montagne grise
en religioso silensio
col so’ umido respiro
e la rosà l’e lagrima
de ‘na note encantà
de deserti e de stèle.
Vento de Dio
che sopia su ‘ na stirpe
senpre en çerca de pace
streta en un serchio de fogo
con altre stirpi e altre religioni.
Israèl gloria e pianto
Ièrusalèm vita o morte.

MAGGIORINA MARIA PERAZZANI
Bovolone (VR)
ORFANO

So ben cossa vól dir,
ma… par la me conossenza aprofondir
el vocabolario ò consultà,
anca se ‘ste parole el me cor le a pugnalà.
«Orfano: persona che ha perso uno
o entrambi i genitori».
Sié ani g’avéa
e ‘na mama che tanto ben la me voléa,
nel leto d’ospedal un dì, l’a guardà
la foto sul comodìn,
dopo… l’a sarà i oci un pochetìn;
la foto la ritraéa el fruto del so amor
che ela l’a lassà, stremà dal dolor.
Passa qualche ano tribulà
nel corpo e nel cor, mi upà,
ma un giorno el Signor
el decide de métar fine a ‘sto dolor
fasendolo volar sui petali de un fior
fin a ragiùngiar in eterno el so amor.
Me mama e mi upà in ciel,
soli, persi e spaentè mi e me fradel,
qua su la tera a tribulàr
e giorno dopo giorno…in meio sperar.
Quante òlte ò domandà: «Parchè Signor?»
E sempre El m’a risposto:
«Dovéa riunir’n amor».
«E a mi eto pensà?
Cossì zóena orfana son restà”.
«Lo so, te g’avarè tanto da tribulàr,
da pìànzar, da pregar;
ma un giorno te te sentirè nel cor, dei pra la tenereza
e alora te dirè:- Del me tribulàr ò fato richeza-».
«Va ben Signor. Anca se non proprio convinta,
ormai Te la dao vinta.
So che Te gh’è tante robe da pensar,
ma un piasér Te voi domandar:
Te sè che par mi, l’è piassè prezioso el canto del me canarin,
l’azuro del più umile fiorelin,
un tramonto rosso sgargiante
che non el piassè costoso brilante;
e alora, làsseme vìvar con un po’ de serenità,
a mi me basta, non pretendo gioia e felicità.»

TERESA DONATELLI
Isola Rizza (VR)
SU LE ALE DE ‘NA PAVEGIA

Ti vien `vanti d’inproviso
ti zè insogno
pensier
fior de pissacan
che’l vento ghe core drio
ti vien zo su le foge ondezando
ti seri le to ale
cofà pressioze pagine de libro raro…
speceti colorai
afresco
fogo artifizial
mosaico
vero de Muran
la luce fa risplender le to s’ciame
fate de tute le zoge de’l mondo
te ciapo tra i dei sacrileghi
me sporco de polvare de quarzo
go tra le man maravegie
oh,
come voria per un fià metarme su
la to grassia
la to legeressa
e deventar anca mi macia de color
libaro
si libaro de svolar dove che vogio
tor suzo el supio, l’anema de le robe
ti lo sa
go ‘ncora le to ale messe via
ne ‘l me vecio calepin de scuola
a la parola AMOR.

GIANNI VIVIAN
Mestre (VE)
EL TENPO

Voria caminare
sensa scarpe nè calsiti;
tornare ai tenpi
ca ierimo tuti poariti
poderme godare oncora
de quea tranquiità,
quando aa sera
dopo aver magnà
se radunaimo tuti in meso
al seese par cantare;
se cantava par desmentegare
le fadighe fate de tante ore
par un poca de farina da inpastare.
Quando i oci alsava
te vedii la luna, le stee
che soo lore luminava.
Oncò xe tuto canbià
la xente al sì e no che i te saluda.
La vera forsa del progresso
xe lo stress, el nervoso,
l’esaurimento che te fa deventare
ogni dì pì fesso.
Xe ani ca no me sento fora aa sera
par vardare le stee:
«Chee sia canbià anca quee !»
Epure na volta ca laorava
soo par inpinare la pansa
pensavo a un doman
co pì speransa.

RESIO VERONESE
Sant’Elena (PD)
PAR ÉSSARE CONTENTO

El to’ sorixo
el poe essare
la porta verta
del Paradixo …
La to’ man,
ne’ la so’ man,
la poe essare ‘na bea esperiensa
par rivar lontan …
On pan, spartìo par metà,
poe salvare l’umanità.
On core spalancà,
el poe essare el fiore
pì beo che Dio ga creà.
Restarà e roxe
e cascarà tuti i spini
sa jutaremo a rissòlvare
i problemi dei nostri vissini.
No ghe xe gnente de pì beo
che jutare nostro fradeo;
chel sia bianco, negro,
bruto o beo!
Mi a go provà …
e, el me core,
el se ga inpinìo de feicità.
Sa vuì provare anca voaltri
a me darì raxon
tuti quanti.

GINA MARIVO
Rovigo
MEMORIA
E tè go persa, cara,
a poco a poco,
co xe finìa la tela de i to giorni.
On muro xe frana
soto i me oci
insieme col castelo de i to sogni.
Tra le begonie vive
«ncora ogni ricordo
de quando in mezo ai fiori el to soriso
spanìa co le verbene ogni matina.
Rinpianzo el tenpo brustola so «1 fogo
de i me pensieri insulsi
incatejà de versi persi
par via del vento muto
solitario
che ‘desso me s-ciafeza
par dispeto.
S’à scancelà el to nome
in riva al mare,
ma mi son la to sabia,
el to bachete
par scrìvare na data che no more.

KEIN MARIO
Padova
ARTE E MODA A VERONA

L’arte l’è come la moda
che gira e regira
in la olta del tempo
e, come ‘na dona, con veli e con drapi,
la mostra a la gente
stranesse e caprissi..
ma se varden ben
i nostri stilisti,
come i artisti
del giorno de ancò,
i çerca gualivi
el marchio pì «usèd»
E…’lora via larga
a brene con sbreghi,
su pansa e zenoci
in barba a miserie
che pianzar le fa.

Se nel çinqueçento la nostra çìtà
mostrava za alora
i du gobeti de Santa Anastasia
con busi ben grossi
in çima ai zenoci..
(e se no te credi..varda..i gh’è ‘ncora.
i è proprio quei che fa penitenza
portando in gropa
lavéi de aqua santa
par benedir tuti i fedeli..)
no voréa mia che,
za capital, d’amor, de storia,
de grande poesia,
la deventasse capa-maestra,
de brene, de sbreghi,de sfranze e de busi,
al par dei du gobi de S. Anastasia
che i è ‘ncora a la moda e..
gnanca i lo sa.

MARIA TERESA VENTURI
Castel d’Azzano (VR)

ANTOLOGIA

I ME VECI

Sti oci che tè varda
vegner grande
e i se fa picoli
e i taze.
Ste man che tè compagna
par la strada
e un dì le tè mola
anca se xe duro
lassarle ‘ndare
e le xe là che le se màzena.
Sti trassi usai a far fadiga
che i tè speta spalancai
se mai tè sbrissi.
Sti caveji
che un fìà a la volta
i se desmentega
del moro dei bei tempi.
Ste rughe che camina
dì par dì
e se se cata veci
sensa saver come.
Pi ve vardo
e pi me perdo
nel sercar parole
che no me vien:
poareto fora
de parole e de caresse,
ma sior de dentro
del ben che me gavì dato.

OSCAR LUNARDON
Bassano del Grappa (VI)

CONCHIGLIE

Lesar ne le strissie de le pière
segni che ricorda la natura:
el fogo, che se smorsa drento l’aqua,
el cel che se specia su la tera;

i à scrito pagine che sona en lontanansa
maraveie sconte ‘n te la piega del pensier;

dindona el mar, drento na conchiglia,
se spaca l’onda sbatendo sora i sassi
torna l’aqua de s-ciuma da la riva
par intonar el canto del creato

e conchiglie, ancora, che torcola nel vento
un fià de cel e tochi de silensio;
sèmena la tera, s’impìssa la semensa
che l’aqua lissia, in trimi de ricordi

e conchiglie che caressa, drento el mar,
fogo nel cel e aqua su la tera.

ANTONIOLI GILBERTO
Verona

PENSIERI GIASSÀI

Fioréti spanìi fora staiòn
durài ‘na matina, sensa colore.
Coriàndoi geài, butài de scondòn
muciài so aiòe restà sensa fiore.
Da vèce raìse, che vive par gnente,
albari scuri, foschi fantasmi
stufi de nebie, coeòr trasparente,
che insiste, nel gèo,
a verzàre i rami.
Vardare vegnere
pa’ i véri de ‘a mente
co fiòchi de neve,
pensieri giassài
e come baeòchi, tirà da putèi
desfarse inte’l core, fredi geài.

FRANCO BENNATO
Conselve (PD)
L’ORO DEL CEL

Piére pressiòse incassé su nel cél,
oci de angeli a veiàr sora’l mondo:
iera le stéle,i-ò viste …le gh’èra!

Monti smussàdi,sbusàdi,desfàdi…
foreste brúsade,ràsade a pél
par sercàr l’oro nel cor de la tera;
gnissùn s’à incòrto che ‘l gh’èra nel cél!

Fanài denànsi a chél Caro, a far ciàro
a cì descósiva l’orlo del mar…
infrusinàndo el piànzar de le nùgole.

Un tabàr gríso querséa la òlta asùra,
restada nuda, malàda, impeldòchida,
orba,a sercàr el slusór de la note…

Ma …ci-élo stà che à smorsàdo le stele?!

ELVIRA VENTURI ZOCCATELLI
Verona
EL TRENO DEA VITA

Coando sarà che l’ora
che rivarà chel treno
che nol conosse orari,
che el fa montare tuti,
gran siuri e porican
parchè da chel momento
i beni, tanti o puchi,
i restarà soa tera,
no ghe sarà el distinguo
tra el nobile e vilan,
perché partiemo tuti
ma sensa gnente in man.
Da coando semo nati
xe tuto prenotà,
la vita pare longa
ma la va via in te on fià.
Però, se coesto vien
co xe el momento giusto,
coando l’età xe vanti
e el corpo tuto frusto,
se ogni uno ga sa dà
el mejo de lu stesso,
vivendo senpre onesto
alora come desso
e, sopratuto in pace
el sta co la cossiensa, s
e meta in moto el treno:
«Signori su, in carossa
xe pronta la partenza».

ADRIANO DE ZOTTI
Castegnero (VI)

FUORI CONCORSO

MADRE

Vorrei ancor donarti
sorrisi e carezze
ma non ci sei …
Cammini fra la luce
nei giardini del cielo
ove la sera non c’è
a spegnere i fiori …

CARLA CAVALLARO
Recoaro terme (VI)
BOCCIOLI MIEI
(A Manuela e Catia)

Terrò nel mio cuore
le vostre sembianze d’ora
e condurrò per mano
i vostri puri sentimenti
fino là
ove qualcuno vi chiamerà
Amore

CARLA CAVALLARO
Recoaro terme (VI)

AL FIGLIO

Bevo rugiada ai fiordalisi azzurri dei tuoi occhi…
Vorrei essere Dio per tramutare questo tempo
in ETERNITA’
e scaldare la tua mano-passero
nel nido della mia.

Figlio, fragile dolcezza…
ti narrerò del mondo,
del vento pellegrino che ci ruba le anime,
dell’aquila-uomo che strappa le ali delle farfalle
variopinte d’innocenza
e del cielo…
che di notte dona manciate di stelle.

Al fuoco che si spegne
m’incanto al tuo puro profilo d’angelo
ed intreccio sogni col biondo esile dei tuoi capelli.

ROSETTA MENARELLO
Stanghella (PD)

NOTTURNO

Gocciola il ritmo del silenzio…
e la sua magia notturna
si apre in abbraccio di lieve farfalla.

Srotola pergamene
il tempo,
folletto dispettoso.

Guarda!
Ti schiude la bocca rossa
dai papaveri
che lei ti portava ridendo
sul bianco delle braccia
nel profumo del grano
violato dalla falce.

In sogno la rondine viene
a scrivere note
d’un amore estivo
addentato nell’oro di un fienile…

Era la giovinezza,
sapore di ciliegia:
quella che tu mordevi
col sorriso ignaro
di chi aspetta che la vita
gli passi accanto
vestita di fiori.

Ora bevi il nettare dei ricordi…
L’anima si fa calice colmo
di nuovi ed insperati umori.

Le passioni si sciolgono
alla dolcezza di una preghiera
sgranata sul velluto della notte
che ti sussurra il passato.

ROSETTA MENARELLO
Stanghella (PD)